شركتي

تتميز شركتي بال"حراك" في السوق وال"عراك" في الشركة، فهي محتله علي مشاريع جميع الوزارات الحكومية، لكن من جوه، كله بيخبط في كله، وكله بيمثل علي كله، حتي تشعر كإنك عايش في مسلسل كبير، يسهل وصفه بعمل درامي ضخم، لا تعرف من هم الابطال ولا المؤلف ولا المخرج، لكنه يتميز بتداخل الاحداث، وفي الآخر انت مش فاهم اي حاجة

تتميز بتقلب الاحوال، زي شهر أمشير بالظبط .. مش ثابت علي رأي، وتلقيها عمالة تجرب يمين وشمال وفوق وتحت، أي حد عنده بدله مقلمة وكرافتة ينفع يقول رأيه، وغالبا هو ده اللي بيمشي، وفي الآخر انت مش فاهم حاجة

تتميز بنباهة العاملين بها، وكيف لا، وهم مروا علي اصعب مراحل التقييم والآداء قبل التوظيف بالشركة، تم تقييمهم بأهم سؤالين في الحياة، سؤال لقياس نسبة الخبث والخيانة وهو "هل تحب شخصية خالد الدالي في مسلسل الدالي" وتكون الإجابة طبعا "نعم"، والسؤال الآخر لقياس نسبة العاطفة وهو "إنت فاكر ابوك الله يرحمه" وتكون الإجابة طبعا "لا" فيردوا عليك بابتسامة - من الودن للودن – "اهو انت كده تنفع تشتغل معانا"

تتميز بان رؤسائها لا "يعلفون" الفرق بين الفرن البلدي والمفاعل النووي، رغم وجود الاتنين في الشركة، وحيث ان الاتنين مراكز قوي، فكل واحد في مركزه شايف نفسه رئيس جمهورية كرسيه، بس من بتوعنا، من اللي بيحب يعد في الكرسي عشرات مئات آلاف السنون

تتميز بأن عملائها من العملة النادرة، التي يصعب وجودها هذه الأيام، عميل لما يطّلع السيستم مشكله في وشه ويسألك عن السبب، ترد بكل براءة دي مقصودة عشلان نوضحلك ان لما السيستم يكون فيه مشكله بنقولك ان فيه مشكلة، تفاجأ بانه يرد عليك بحماس ويقول "هذا والله سيستم زين"

تتميز بانها مثل العفش الجاهز، من بره جميل قوي، بس من جوه خيش وقش، وللأسف احنا قاعدين جوه مش بره، لحد ما عقولنا بقت كلها قش (محبش الخيش) ... والسؤال اللي بيطرح نفسه بشده، طب انا قاعد فيها ليه ... من غير شتيمه ... اصل بحب التمثيـــــــــل